Kampen tilbake til arbeidslivet
Abstract
Innleiing: Stadig fleire blir friske av sin kreftsjukdom grunna betre diagnostikk og behandling. Unge vaksne kreftoverlevarar er ekstra utsett for seineffektar fordi behandlinga er aggressiv og intensiv, samt at toleransen for biverknadar er høg. Ved avslutta kreftbehandling står pasientane på eigne bein utan støtte frå helsepersonell. For å kunne skape ein betre overgang frå kreftbehandling til arbeidslivet er det nødvendig å vite kva utfordringar denne gruppa står ovanfor. Problemstilling: Kva utfordringar har unge vaksne kreftoverlevarar som følge av seineffektar i møte med arbeidslivet etter enda kreftbehandling?
Metode: Litteraturstudie. Litteratursøk vart gjort i databasane Medline, CHINAL, PubMed og psykINFO og SweMed+. Søkeorda som var nytta var «cancer survivors», «young adult», «adolescent», «return to work», «work», «late effect».
Resultat: Gjennomgang av sju primærartiklar synleggjer eit bredt spekter av psykiske og fysiske seineffektar som påverka returen til arbeidslivet. Dei mangla kunnskap og informasjon om dette for å vere førebudd på livet etter kreftbehandling. Mange opplev nedsett arbeidskapasitet, og har bekymringar for korleis det vil påverke arbeidsevna på kort og lang sikt.
Konklusjon: Det kan synest at denne gruppa fell mellom to stolar etter kreftbehandlinga. Det kan vere nødvendig å sjå på moglegheita for å opprette instansar som kan følge opp seineffektar og hjelpe unge vaksne kreftoverlevarar i vegen tilbake i arbeid. Det kan vere avgjerande for å sikre ein god overgang frå kreftbehandling til arbeidslivet.
Description
Fordypningsoppgave i Kreftsykepleie 2020